Il Blog di Mimmo Guarino

Passa ‘o tiempo, passa
e passa senza pietà pe cose mie,
passa e me leva a terra a sotto e piede

Passa ‘o tiempo, passa
e passa senza scuorno, senza crianza,
passa e me roseca sta vita a poco a poco

Passa chillo ‘nfame
e me sbatte contro e mmura,
me guarda,
e po me ride ‘nfaccia

E io pure ‘o guardo,
o guardo ‘nfaccia e le dico:
ride,
ride, ride pure strunzo ca nun si ato
nun o saje
che io te aggio fottuto ?

cu st’ ammore dinto ‘o core
nun me faje cchiù paura !

Mimmo

>>Testo con traduzione

‘O munno ?
‘O munno, signori miei, è fatto de tanta ciucci

si, si avite capito bbuono
tanta ciucci,

Ciucci, e ciucce
ovviamente
e sinnò a parità a ‘ndò va a fernì ?

Ciucci io,
ciuccio tu,
ciucci tutte quante.

Istruiti o analfabeti,
cu ‘e sorde o muorte e ‘famme,
simme sulo tanta ciucci.

Si, sentite a me,
simme tanta ciucci,
tanta ciucci ‘nzriusi e cu ‘e parauocchie,

e ogni uno e chisti ciucci
vede sulo chello ca vo vedè,

e ogni uno e chisti ciucci,
penza sulamente a ‘e cazze suoje

Cammino,
da cchiù de n’ora sto a cammenà,
sotto a nu cielo ‘mbrugliuso
cu ‘o sole che jesce e ttrase
e ‘o mare che ogni ttanto me bagna i piedi

a ggente ca me vede ‘e passà, me guarda,
me guarda, ma a me nun me ‘mporta,
pecchè a ‘ggente o saccio,
a ‘ggente tene tutta a stessa faccia

Cammino,
da cchiù de n’ora sto a cammenà,
cu e piede che m’ affonnano dinto a rena ‘nfosa
‘o ppoco e viento ca me rinfresca a faccia e l’ addore de ‘o mare ca me ‘ntrona a capa

doje creature currenno, cuntente me passano ‘nnanzo,
passano e io ‘e guardo,
pecchè ogni creatura o saccio,
ogni creatura tene a faccia soja

Oggi nun voglio fa niente,
voglio sulo cammenà,
cu ‘e mmane dinto a sacca
e cu ‘a faccia stesa ‘a ‘o sole

Oggi voglio fa filone ‘a cchesta vita,
voglio correre,
ma che ddico correre,
oggi voglio vulà

Oggi voglio essere libbero,
voglio fa ‘a via cchiù longa,
senza me peroccupà e arrivà tarde,
oggi voglio fa cu ‘a capa mia

Oggi sta vita ma voglio magnà ‘mmiezz ‘o pane,
a muorze,
senza crianze
e senza manco lavarme e mmane

Oggi voglio fa ‘o scostumato, cu o pietto a fore,
voglio piscià ‘nfaccia ‘e mmura,
voglio sfottere ‘a ggente che passa
perfino ‘o tiempo voglio cuffià

Oggi ‘nzomma,
me voglio sentere cchiù e nu ‘rrè,
ma a ‘lla fine e sta jiurnata,
voglio murì pe ‘ttè

Io e te
na cosa sola
oggi e pe sempe,
comme 'o ciummo e o mare
comme è fuoco e a lava

Io e te
na cosa sola
oggi e pe sempe,
comme 'o dulore e 'o chianto
comme a felicità e a rrisa

Io e te
na cosa sola
oggi e pe sempe,
comme a forza e a gioventù
comme a stanchezza e a vicchiaia

Io e te
na cosa sola
oggi e pe sempe,
comme a vela e o viento
comme a spreanza e o tiempo

Io e te
na cosa sola
oggi e pe sempe,
comme a carne e 'o sangue
comme 'o ciato e a vita

Io e te
na cosa sola
oggi e pe sempe,
comme Dio e ll'ammore
comme ll'ammore e tu.

Parole, parole,
quali pparole aggia truvà ancora ?

parole cca ‘nce ne stanno cchiù,

so ffernute ‘e pparole,
so ffernute

e po e parole so sulo parole
e che ponno fa ‘lloro sole ?

e parole so sulo parole
e o viento si o vvò se pporta !

mo ca tu te ne si gghiuta
nun ‘ncè rimasto cchiù niente dinto a cchesta vita mia

‘ncè rimasto sulo ‘o ppoco e appucundria
‘ncè rimasto sulo chesta smania mia